ວັນເສົາ, 19 ເດືອນເມສາ 2025
Lao National Logo

ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ

ສະໂມສອນສົ່ງເສີມ ສິລະປະ ວັດທະນະທຳ ລາວບັນດາເຜົ່າ

ເລກທີ 001-02/ສວຜ. ນະຄອນຫຼວງວຽງຈັນ, ວັນທີ 09/03/2010

ຂໍ້ກຳນົດຂອງປະທານຄະນະບໍລິຫານງານ ສະໂມສອນສົ່ງເສີມ ສິລະປະ ວັດທະນະທຳ ລາວບັນດາເຜົ່າ (ສວຜ.) ວ່າດ້ວຍ ການແຕ່ງຕັ້ງຄະນະຈັດຕັ້ງປະຕິບັດ ພາລະບົດບາດ ແລະ ຫນ້າທີ່ຂອງ ສວຜ ມີຊື່ວ່າ: ລາວວິໄສທັດ/ສວຜ.

  • ອີງໃສ່ຂໍ້ຕົກລົງສະບັບເລກທີ: 158/ຖວ ລົງວັນທີ 02/04/2004 ຂອງລັດຖະມົນຕີວ່າການກະຊວງຖະແຫຼງຂ່າວ ແລະ ວັດທະນະທຳ ວ່າດ້ວຍການສ້າງຕັ້ງສະໂມສອນ ສົ່ງເສີມສິລະປະ ວັດທະນະທໍາ ລາວ ບັນດາເຜົ່າ (ສວຜ).
  • ອີງໃສ່ຂໍ້ກຳນົດສະບັບເລກທີ 860/ຖວ ລົງວັນທີ 24/08/2004 ຂອງລັດຖະມົນຕີວ່າການກະຊວງຖະແຫຼງຂ່າວ ແລະ ວັດທະນະທຳ ວ່າດ້ວຍທີ່ຕັ້ງພາລະບົດບາດຫນ້າທີ່ ແລະ ຂອບເຂດສິດເຄື່ອນ ໄຫວຂອງ ສະໂມສອນ ສວຜ.
  • ອີງໃສ່ຂໍ້ຕົກລົງສະບັບເລກທີ 722/ຖວ ລົງວັນທີ 23/08/2008 ຂອງລັດຖະມົນຕີວ່າການກະຊວງຖະແຫຼງຂ່າວ ແລະ ວັດທະນະທຳ ວ່າດ້ວຍການອະນຸມັດໃຫ້ສະໂມສອນ ສວຜ. ສ້າງສາລະຄະດີວັດທະນະທຳ ຂັບລຳ ພື້ນເມືອງ ທີ່ເປັນເອກະລັກ ແລະ ແບບສະບັບຂອງລາວບັນດາເຜົ່າ.

ເພື່ອສືບຕໍ່ຈັດຕັ້ງປະຕິບັດຂໍ້ຕົກລົງ ແລະ ຂໍ້ກຳນົດຂ້າງເທິງ, ໃຫ້ເປັນຮູບປະທຳ ແລະ ໄດ້ນຳອອກຮັບໃຊ້ສັງຄົມ ໃຫ້ໄດ້ຫຼາຍຮູບຫຼາຍສີ, ທັງພາຍໃນ ແລະ ຕ່າງປະເທດ ເຊິ່ງໃນໄລຍະຜ່ານມາ ທາງສະໂມສອນ ສວຜ. ກໍ່ມີການສ້າງຕັ້ງບາງຂະແຫນງການຂຶ້ນ ແລະ ໄດ້ຮັບໃຊ້ສັງຄົມມາແລ້ວເຊັ່ນ: ວົງສິລະປະດົນຕີພື້ນເມືອງ ລາວບັນດາເຜົ່າ, ຫ້ອງບັນທຶກສຽງ ແລະ ໂທລະພາບລາວສຕາຣ໌. ແຕ່ສິ່ງທີ່ໄດ້ສ້າງຕັ້ງມາກໍ່ ພຽງແຕ່ເປັນພາກສ່ວນຫນຶ່ງ ຂອງບັນດາໂຄງປະກອບ ຕາມພາລະບົດບາດ ແລະ ຫນ້າທີ່ຂອງສະໂມສອນ ສວຜ. ໃນເບື້ອງຕົ້ນເທົ່ານັ້ນ, ໂດຍອີງຕາມພາລະບົດບາດ ແລະ ຫນ້າທີ່ດັ່ງກ່າວຈຶ່ງໄດ້ຈັດຕັ້ງໃຫ້ມີຂະແຫນງການນີ້ຂື້ນ. ລາວວິໄສທັດ/ສວຜ. ເພື່ອເປັນຝ່າຍສືບຕໍ່ຈັດຕັ້ງປະຕິບັດ ພາລະກິດຂອງສະໂມສອນ ໃນທຸກດ້ານໃຫ້ເກີດຫມາກຜົນຕົວຈິງ ແຕ່ລະຂັ້ນຕອນ, ມີເນື້ອໃນໂຄງປະກອບການລຸ່ມນີ້:

I. ວັດຖຸປະສົງ ແລະ ເປົ້າໝາຍ

1. ຈັດຕັ້ງປະຕິບັດພາລະບົດບາດ ແລະ ຫນ້າທີ່ຂອງ ສວຜ. ໃຫ້ເປັນຮູບປະທຳ ແຕ່ລະບາດກ້າວ ແລະ ຫນັກແຫນ້ນ ໃນການສົ່ງເສີມ ສິລະປະວັດທະນະທໍາລາວບັນດາເຜົ່າ, ບົນພື້ນຖານຫຼັກການ ແລະ ເຫດຜົນ ຢູ່ໃຕ້ຂອບແນວທາງນະໂຍບາຍຂອງພັກ ແລະ ລັດຖະບານທີ່ໄດ້ວາງອອກແຕ່ລະໄລຍະ ດັ່ງມີບັນດາ ກິດຈະກໍາຕ່າງໆ ທີ່ເປັນເປົ້າຫມາຍດັ່ງລຸ່ມນີ້:

1.1. ສືບຕໍ່ຈັດຕັ້ງປະຕິບັດກິດຈະກຳ ສ້າງສາລະຄະດີ ສິລະປະວັດທະນະທຳ ທີ່ເປັນເອກະລັກ ແລະ ແບບສະບັບຂອງລາວບັນດາເຜົ່າ ທີ່ພວມດໍາເນີນຢູ່ປັດຈຸບັນໃຫ້ບັນລຸຜົນ ແລະ ນຳມາຮັບໃຊ້ສັງຄົມ ໄດ້ເປັນຢ່າງດີ.

1.2. ສ້າງກິດຈະກຳຕ່າງໆ ທີ່ມີການຕິດພັນກັບການປົກປັກຮັກສາ ແລະ ພັດທະນາປະເທດຊາດ ເພື່ອຮັບໃຊ້ສື່ໂຄສະນາ ເຜີຍແຜ່ພາບພົດອັນດີງາມ ທາງດ້ານການເມືອງ-ເສດຖະກິດ ແລະ ວັດທະນະທໍາສັງຄົມ, ໂຄສະນາທ່າແຮງ ແລະ ຄວາມອາດສາມາດ ການທ່ອງທ່ຽວລາວ (ວັດທະນະທຳ, ທຳມະຊາດ ແລະ ປະຫວັດສາດ) ປະກອບສ່ວນສ້າງສິ່ງດຶງດູດໃຈນັກທ່ອງທ່ຽວ ໃຫ້ເຂົ້າມາທ່ຽວລາວ ນັບມື້ນັບຫຼາຍ ອັນຈະນຳຜົນປະໂຫຍດ ມາໃຫ້ແກ່ປະເທດຊາດ ແລະ ປະຊາຊົນລາວບັນດາເຜົ່າ ໄດ້ເປັນຢ່າງດີ.

1.3. ສ້າງໂອກາດການສຶກສາ ເຝິກອົບຮົມດ້ານການນິເທດ ສັນສ້າງບຸກຄະລາກອນຢ່າງຮອບດ້ານ ດ້ານສື່ມວນຊົນ ເພື່ອຮອງຮັບວຽກງານ ໃຫ້ແກ່ໂທລະພາບ ລາວສຕາຣ໌ ແລະ ຮັບໃຊ້ສັງຄົມ.

1.4. ສຶກສາຄົ້ນຄວ້າ ສ້າງສູນສິລະປະຊີບນາໆ ປະການ ທີ່ກ່ຽວພັນທາງດ້ານສິລະປະວັດທະນະທຳ ທີ່ເປັນເອກະລັກ ແລະ ມູນເຊື້ອ ຂອງລາວບັນດາເຜົ່າ (ທັງພາຍໃນ ແລະ ຮ່ວມມື ຮ່ວມສຳພັນ ກັບອົງກອນອື່ນໆ ທີ່ກ່ຽວພັນທັງພາຍໃນ ແລະ ຕ່າງປະເທດ) ເພື່ອສົ່ງເສີມສິລະປະວັດທະນະທໍາ ລາວບັນດາເຜົ່າ ແລະ ທັງເພື່ອເປັນການປະກອບສ່ວນສ້າງວຽກເຮັດງານທໍາໃຫ້ແກ່ສັງຄົມ.

1.5. ສ້າງຂະບວນການ ແລະ ເທດສະການຕ່າງໆ ທາງດ້ານສິລະປະ ວັດທະນະທຳອັນດີງາມ ຂອງລາວບັນດາເຜົ່າ (ປະກວດຂັບລໍາທ້ອງຖີ່ນ ທີ່ເປັນເອກະລັກ ແລະ ແບບສະບັບຂອງບັນ ດາເຜົ່າ ແລະ ເຂດທ້ອງຖີ່ນ, ຮ້ອງເພງ, ດົນຕີ, ຈັດງານຄອນເສີດ, ປຸກລະດົມຂະບວນການ ຕ້ານຢາເສບຕິດ ແລະ ຈັດສັນຫາດອກຟ້າເມືອງລາວ. ປະກວດສີໄມ້ລາຍມື ທີ່ໂດດເດັ່ນຂອງ ຄົນລາວບັນດາເຜົ່າ. ປະພັນ, ປະດິດແຕ່ງ, ຂຽນບົດກາບກອນ, ສາລະຄະດີນິຍາຍ, ລະຄອນ, ເສີມສ້າງງານກິລາກາຍຍະກຳ, ງານເທດສະການທີ່ກ່ຽວພັນ ທາງດ້ານວັດທະນະທຳ ແລະ ອື່ນໆ ທີ່ນອນຢູ່ໃນການສົ່ງເສີມ ສິລະປະວັດທະນະທໍາ ລາວບັນດາເຜົ່າ, ແນໃສ່ປະກອບສ່ວນປູກຈິດສຳນຶກ ໃຫ້ແກ່ຄົນລາວ ສະເພາະຢ່າງຍິ່ງຊາວຫນຸ່ມ, ເຍົາວະຊົນ, ເສີມສ້າງນ້ຳໃຈຮັກຊາດ, ຮັກລະບອບໃຫມ່ ສປປ. ລາວ ຢູ່ໃຕ້ການນໍາພາຂອງພັກ. ຮັກວັດທະນະທໍາ ອັນດີງາມຂອງລາວ, ຫ່າງເຫີນອອກຈາກສັງຄົມມົ້ວສຸມ ທີ່ລູກຫຼານເຂົ້າມາເບື່ອເມົາ ຢູ່ໃນສັງຄົມລາວ ຢູ່ໃນປະຈຸບັນ.

1.6. ດຳເນີນການຜະລິດ ຜະລິດຕະພັນ ວັດທະນະທໍາ, ທັງຫມົດລາຍການທີ່ໄດ້ກ່າວຂ້າງເທີງ ໃຫ້ເປັນສື່ໂຄສະນາເຜີຍແຜ່ຢ່າງກວ້າງຂວາງ ໃນທົ່ວສັງຄົມທັງພາຍໃນ ແລະ ຕ່າງປະເທດ (ແຜ່ນພັບ, ສາລະຄະດີດ ຊີດີ, VCD,DVD…) ທັງເປັນຜະລິດຕະພັນສະຫນອງໃຫ້ແກ່ລາຍການ ໂທລະພາບລາວສຕາຣ໌ ໃຫ້ອຸດົມສົມບູນຫຼາກຫຼາຍສີສັນ ໃຫ້ຄົນລາວຮູ້ລາວ, ຮັກຊາດລາວ, ຮັກວັດທະນະທຳລາວ, ຊົມໃຊ້ຜະລິດຕະພັນຂອງລາວ, ຫ່າງເຫີນອອກຈາກການຊົມ ໃຊ້ຂອງຊາດອື່ນໆ ເປັນແຕ່ລະກ້າວ ເພື່ອນໍາຜົນປະໂຫຍດສູງສຸດ ໃນດ້ານນີ້ມາໃຫ້ແກ່ປະເທດຊາດ. ແກ່ປະຊາຊົນລາວ ແລະ ສັງຄົມລາວ.

2. ວ່າດ້ວຍການສ້າງຕັ້ງ.

ເພື່ອເຮັດໃຫ້ວັດຖຸປະສົງ ແລະ ເປົ້າຫມາຍ ຂອງພາກທີ I ທີ່ໄດ້ກ່າວມາ ໄດ້ຮັບການຈັດຕັ້ງປະຕິບັດ ໃຫ້ເປັນຮູບປະທຳ ແລະ ນຳຜົນປະໂຫຍດສູງສຸດ ມາໃຫ້ແກ່ສັງຄົມ ແລະ ອົງກອນທີ່ກ່ຽວພັນ, ຈຶ່ງໄດ້ກຳນົດລັກສະນະຈຸດພິເສດ ຂອງອົງກອນດັ່ງນີ້ຄື:

2.1. ທີ່ຕັ້ງແລະພາລະບົດບາດ.

2.1.1. ເປັນຂະແຫນງຫນຶ່ງຂອງສະໂມສອນ ສວຜ.

2.1.1. ເປັນຫົວຫນ່ວຍຈຸນລະພາກຫນຶ່ງຂອງ ສວຜ. ດຳເນີນການເຄື່ອນໄຫວ ໂດຍມີການຄິດໄລ່, ໄລ່ລຽງປະສິດທິຜົນລາຍຮັບ, ລາຍຈ່າຍກຸ້ມຕົນເອງທາງດ້ານແຮງງານເງິນເດືອນ, ພັນທະການຈັດຕັ້ງແຫ່ງລັດ ແລະ ການຈັດຕັ້ງຂັ້ນເທີງ ທີ່ກ່ຽວພັນ (ປະສິດທິຜົນ ເສດທະກິດ ຕິດພັນກັບສັງຄົມ)

2.1.3. ນຳໃຊ້ກາໝາຍ ສວຜ.

2.2. ໜ້າທີ່ ແລະ ຂອບເຂດສິດເຄື່ອນໄຫວ

2.2.1. ຈັດຕັ້ງປະຕິບັດ: ຕາມຂອບຂອງພາລະ ບົດບາດ ແລະ ຫນ້າທີ່ຂອງ ສວຜ. ທີ່ໄດ້ມີການ ກຳນົດໄວ້. ໃນຂໍ້ກຳນົດ ຂອງລັດຖະມົນຕີວ່າການກະຊວງຖະແຫຼງຂ່າວ ແລະ ວັດທະນະທຳ ແລະ ຕາມກິດຈະການ ແລະ ໜ້າວຽກທີ່ໄດ້ກຳນົດວັດຖຸປະສົງ ແລະ ເປົ້າໝາຍຂອງຂໍ້ກຳນົດສະບັບນີ້.

2.2.2. ຂອບເຂດເຄື່ອນໄຫວ:

– ຈັດຕັ້ງປະຕິບັດໜ້າທີ່ ໃນຂອບເຂດໜ້າວຽກໂດຍກຳນົດໄວ້ໃນພາກທີ່ 1 ໃຫ້ມີປະສິດທິພາບ ແລະ ປະສິດທິຜົນ ບໍ່ແມ່ນແຕ່ປະສິດທິຜົນທາງເສດຖະກິດ ແຕ່ຕ້ອງສົງຄົມອີກດ້ວຍ
– ມີສິດພົວພັນປະສານງານ, ກຳອົງການຈັດຕັ້ງແຫ່ງລັດ ທີ່ກ່ຽວຂ້ອງ ແລະ ມີສິດຜູກພັນສັນຍາ, ຮ່ວມມື, ຮ່ວມສຳພັນ ກັບອົງກອນຕ່າງໆ ທັງພາຍໃນ ແລະ ຕ່າງປະເທດ ທີ່ກ່ຽວພັນ! ຕາມລະບຽບຫລັກການຂອງ ສວຜ. ກຳນົດໄວ້ ແລະ ອະນຸມັດ.
– ມີສິດຄັດສັນຫາບຸກຄະລາກອນ ເຂົ້າມາປະກອບໃສ່ອົງກອນຂອງຕົນຕາມຕ້ອງການ.

3. ຮູບລັກສະນະສາຍໄຍລະບົບການຈັດຕັ້ງ.

3.1. ລະບົບການຈັດຕັ້ງ.

4. ໂຄງປະກອບບຸກຄະລາກອນ ແລະ ຕຳແໜ່ງງານ.

ບຸກຄະລາກອນ ທີ່ຄັດສັນເຂົ້າມາປະກອບໃສ່ ລວທ/ສວຜ. ນີ້ ແມ່ນໄດ້ແບ່ງເອົາຈາກໂທລະພາບ ລາວສຕາຣ໌ ແລະ ຈາກສະໂມສອນ ສວຜ. ບາງສ່ວນກໍ່ຍັງດໍາເນີນທັງສອງຕຳແໜ່ງ (ໂທລະພາບ ແລະ ລວທ) ແລະ ສ່ວນຫນຶ່ງໄດ້ເຂົ້າມາເຮັດວຽກ ລວທ. ຂາດໂຕ. ແຕ່ມີຫນ້າທີ່ກ່ຽວພັນ ແລະ ຊ່ວຍຊູເຊິ່ງກັນ ແລະກັນລະຫວ່າງ 2 ຂະແຫນງການນີ້, ແຕ່ໃນຂໍ້ກຳນົດສະບັບນີ້ ຈະແຕ່ງຕັ້ງສະເພາະແຕ່ຄະນະອຳນວຍການ ແລະ ຫນ້າທີ່ຮັບຜິດຊອບ ຂອງແຕ່ລະຝ່າຍເທົ່ານັ້ນ ດັ່ງມີລາຍຊື່ ແລະ ຕໍາແຫນ່ງງານລຸ່ມນີ້:

4.1. ທ່ານ ນາງ ມະນີຈິດ ໄຊຍະວົງ ຕຳແໜ່ງ: ອຳນວຍການໃຫ່ຍ ຮັບຜິດຊອບລວມ ທຸກການເຄື່ອນໄຫວຂອງ ລວທ. ຕໍ່ ສວຜ.
4.2. ທ່ານ ວັນນະເດດ ແກ້ວວຽງຄຳ ຕຳແໜ່ງ: ຮອງອຳນວຍການ ຮັບຜິດຊອບຝ່າຍບໍລິຫານຫ້ອງການ, ການຄຸ້ມຄອງ ແລະ ການປະສານງານ
4.3. ທ່ານ ນາງ ອະນຸພອນ ບຸນຍາວົງ ຕຳແໜ່ງ: ຮອງອຳນວຍການ ຮັບຜິດຊອບເປັນຜູ້ຈັດການຝ່າຍແຜນການ, ສື່ສານການຕະຫຼາດ, ຝ່າຍຂໍ້ມູນຂ່າວສານ ແລະ ການຮ່ວມມືພາຍໃນ ແລະ ຕ່າງປະເທດ.

ສ່ວນບຸກຄະລາກອນຄັດສັນ ໃສ່ແຕ່ລະໜ່ວຍງານຂອງ ລວທ. ນັ້ນ ມອບໃຫ້ອຳນວຍການ ແລະ ຄະນະສຶກສາຄົ້ນຄວ້າ ແລະ ປະກອບຕາມຮ່າງໂຄງປະກອບການຈັດຕັ້ງ ຄັດຕິດຊ້ອນມາພ້ອມນີ້

II. ຂັ້ນຕອນ ແລະ ວິທີການຈັດຕັງປະຕິບັດ ກິດຈະກຳ

ພາຍຫຼັງໄດ້ຮັບຂໍ້ກຳນົດສະບັບນີ້ແລ້ວ. ຄະນະທີ່ໄດ້ຮັບມອບໝາຍໃຫ້ຮັບຜິດຊອບ, ຕ້ອງຜັນຂະຫຍາຍໃຫ້ເປັນຮູບປະທຳ ເປັນແຕ່ລະຂັ້ນຕອນ ເປັນແຕ່ລະໜ້າວຽກຢ່າງໜັກແໜ້ນ ແລະກ້າວຂຶ້ນ:

– ສ້າງແຕ່ລະກິດຈະກຳ ໃຫ້ເປັນແຜນງານ, ແຜນເງີນ ແລະ ແຜນບຸກຄະລາກອນ.
– ແຜນກຳນົດຕາຕະລາງເວລາ (ເລີ້ມຕົ້ນ ແລະ ສຳເລັດ).
– ຊູກຍູ້, ກວດກາ, ດັດປັບ.
– ສະຫຼຸບຖອດຖອນບົດຮຽນ.
– ລາຍງານຂໍຄວາມເຫັນ.

III. ບາງທິດນຳ ຕ້ອງເອົາໃຈໃສ່.

1. ທຸກການເຄື່ອນໄຫວຈັດຕັ້ງປະຕິບັດ ແຕ່ລະກິດຈະກຳຕ້ອງຕິດພັນກັບແນວທາງນະໂຍບາຍທີ່ກ່ຽວພັນຂອງພັກ ແລະ ລັດກໍ່ຄືຂອງກະຊວງຖະແຫຼງຂ່າວ ແລະ ວັດທະນະທໍາ ແລະ ຕິດພັນກັບພາລະ ບົດບາດ ແລະ ຫນ້າທີ່ຂອງ ສວຜ.

2. ຕິດພັນກັບການສ້າງບຸກຄະລາກອນທາງດ້ານວິຊາຊີບ, ວິຊາສະເພາະ ແລະ ບຸກຄະລິກພາບ (ສ້າງໃຫ້ໄດ້ທາງສຳມັດຕະພາບຂອງງານ, ຈິດສໍານຶກເປັນເຈົ້າມີວິຊາຊີບ, ວິຊາການ, ມີຄຸນສົມບັດ ແລະ ມາລະຍາດທາງສັງຄົມ, ສະພາະຢ່າງຍິ່ງສ້າງໃຫ້ມີນ້ຳໃຈຮັກຊາດ, ຮັດລະບອບໃຫມ່ ສປປ ລາວ ຢູ່ໃຕ້ການນໍາພາຂອງພັກ ແລະ ລັດມີສະຕິຈັດຕັ້ງ ແລະ ລະບຽບວິໄນສະເພາະຢ່າງຍິ່ງຊາວຫນຸ່ມເຍົາວະຊົນ ໃຫ້ເປັນຜູ້ສືບທອດອະນາຄົດຂອງຊາດ.

3. ປະຕິບັດຫຼັກການ ໃນການດຳເນີນການກິດຮ່ວມກັນ ໃຫ້ໄດ້ບາງປະການລຸ່ມນີ້: 

– ອຸດົມການຮ່ວມ.
– ຮູບ ໃນການເຄື່ອນໄຫວ ແລະ ແບບແຜນວິທີເຮັດວຽກຮ່ວມ.
– ຜົນປະໂຫຍດຮ່ວມ.
– ອະນາຄົດຮ່ວມ ແລະ
– ຮັບຜິດຊອບຮ່ວມກັນ.

IV. ຂໍ້ບັນຍັດ.

– ມອບໃຫ້ຄະນະທີ່ໄດ້ແຕ່ງຕັ້ງຮັບຜິດຊອບ ຈົ່ງໄດ້ຈັດຕັ້ງປະຕິບັດຂໍ້ກຳນົດ ສະບັບນີ້ຢ່າງເຂັ້ມງວດ. ຢ່າງມີປະສິດທິພາບ ແລະ ປະສິດທິຜົນສູງ.
– ສະຫຼຸບລາຍງານປົກກະຕິ ເດືອນ, ປີ ແລະ ແຕ່ລະກິດຈະກຳ ແຕ່ລະໄລຍະ.
– ກຳນົດແຜນວຽກໄລຍະຕົ້ນ, ກາງ ແລະ ຍາວ ສ້າງກິດຈະການໃດໃຫ້ສໍາເລັດ ເປັນແຕ່ລະກິດຈະກຳ, ບໍ່ຊະຊາຍແກ່ຍາວ.
– ປະຕິບັດຖືກຕ້ອງຕາມແນວທາງນະໂຍບາຍ ແລະ ລະບຽບກົດຫມາຍຂອງພັກ ແລະ ລັດຖະບານ ຢ່າງເຂັ້ມງວດ, ກໍ່ຄືພາລະບົດບາດຂອງສະໂມສອນ ສວຜ. ທີ່ໄດ້ກຳນົດໄວ້ໃນຂໍ້ກຳນົດຂອງລັດຖະມົນຕີ ວ່າການກະຊວງຖະແຫຼງຂ່າວ ແລະ ວັດທະນະທຳ ແລະ ຂໍ້ກຳນົດຂອງ ສວຜ. ສະບັບນີ້.

ຂໍ້ກຳານົດສະບັບນີ້ມີຜົນສັກສິດ ໃນການຈັດຕັ້ງປະຕິບັດ ແຕ່ມື້ໄດ້ລົງລາຍເຊັນເປັນຕົ້ນໄປ.

ຂໍ້ກຳານົດສະບັບນີ້ມີຜົນສັກສິດ ໃນການຈັດຕັ້ງປະຕິບັດ ແຕ່ມື້ໄດ້ລົງລາຍເຊັນເປັນຕົ້ນໄປ.

ແຈ້ງ ໄຊຍະວົງ

ປະທານ ສະໂມສອນ ສົ່ງເສີມສິລະປະ 
ວັດທະນະທຳ ລາວບັນດາເຜົ່າ

ບ່ອນສົ່ງ :
– ກະຊວງຖະແຫຼງຂ່າວ ແລະ ວັດທະນະທໍາ
(ກົມສື່ມວນຊົນ, ກົມສິລະປະການສະແດງ)
(ເພື່ອຊາບ ແລະ ໃຊ້ຕາງລາຍງານ)
– ຄະນະອຳນວຍການ ແຕ່ລະທ່ານ ເພື່ອຈັດຕັ້ງປະຕິບັດ.
– ໂທລະພາບ ລາວສຕາຣ໌ ເພື່ອຊາບ ແລະ ໃຫ້ການປະສານງານຮ່ວມມື)
– ສຳເນົາເກັບໄວ້.

ເອກກະສານອ້າງອິງ : Download